Г1АЛГ1АЙ МЕХКА КЪАМАН ЮКЪАРА ГАЗЕТ

​Кагирхой форум «БАРТ»

Укх шерарча 11-ча мартера денз 13-ча марте кхаччалца «Iармхи» курорте дIаяхар кагирхой форум «Барт». Форуме дакъалоацаш бар вай мехкара 9-11 классера дешархой, 30 саг, хIаьта из вIашагIъеллараш а, дIаехьараш а бар – «Доазув ца довза дегаш» цIи йолча, гIо эшача наха новкъостал деча фонда кулгалхо, Бекмурзиев Мувса, иштта кагирхой гIулакхий комитета болхлой, къамай гIулакхий министерствой болхлой, кхыча мехкара бийха хьаьший.

Форума керттера декхар дар хIаране дувцачунга ладувгIа, цун оамалашта сатоха, вахар кхетаде — кагирхой Iомабелар, кхамашта юкъера мотт лаха хар, динашта юкъе машар латтийта Iомабелар, герзаца хIама тоаде йиш йоацалга кхетадар.

Вай лакхе аьннача тайпара, из форум вIашагIаеллача вай республикера къамай министерствос, «Доазув ца довза дегаш» цIи йолча фондо, цу лоарIамерча вIашагIкхетаре бийхабар тайп-тайпара моттигашкара-гIулакхашкара нах: бусалба дина викал, психолог, наха юкъера гIулакхаш леладу нах, кагирхой комитета болхлой. ХIаьта Iомалураш, тренингаш еш хиннараш бар вай мехкара лакхерча классашкара дешархой.

Вай берашта хьеха, уж Iомабе бийхабар Дагестанера цIи хеза журналист а, блогер а вола Амиров Мухтар, иштта Дагестанера С. Афанде цIерах йолча бусалба дина института хьехама дакъан кулгалхо Яхьяев ИбрахIим.

ВIашагIкхетара программа дIахьош, аьттув хилар вай дешархой команде болх бе Iомабала, цхьаццадола, паччахьалкхен а, сага а вахаре хила йиш йола бахьанаш а увттадеш, царца доагIача хаттарашта жоп ле. ДукхагIча даькъе, форум «Iарамхи» курорте дIаяхар, Iалаьмате хозача моттиге.

Дагестанера хьаьшаша вай дешархошта хьийхар тоаба вIашагIайолла мишта еза а, цун юкъе пайдане хургболаш болх мишта бе беза а. ЛоархIаме а, пайда хьабоалаш а да цу тайпара ловзараш. Бокъонца а долаш цу тайпара хаттар вахаре эттача, шоай фу де деза ховргда цар. Тренингех пайда хьабаларах цхьаккха шеко а яц.

Конфликташ мишта дIайоах, мишта хьахилийтац – кагирхошта дийцар психолога Дзейтава Маретас. Из я ГIалгIай паччахьалкхен университета психологе кафедра доцент. Иштта ше хьайийлача «Генезис» цIи йолча фонда кулгалхо я.

Бекмурзиев Мувсас белгалдаьккхар, форума керттера тема – экстремизма духьале йир хержар – ца ховш хиннадоацалга. «Тахан, къонача тIехьен проблемаш ювца эттача, цул лоархIамегIа кхы хIама дац вай мехка», — аьлар цо.

Массане а кхетаду тахан, кхувш йоагIаш латтача тIехьен хьоашка экстремизма уйлаш чукхувсаш латталга а, ца хаддаш цу хIаманца къовсам лоаттабе безалга а.

Иштта, ший дешархошца форуме дакъа лоацаш яр дукханена вай мехка йовза ЖIайрахара хьехархо, блогер, Льянова Рая. Ший дешархошца цхьана цо а хьаийцар курсаш чакхъяхарах дола диплом.

ШозлагIа хулаш яр укх шера ер тайпара форум, дIахо – хIара шера из хилийта лаьрхIа ба форум «Барт» дIахьораш…

Р. Цуров

«Сердало» № 34

17.03.2017 17:11
33

Комментарии

Нет комментариев. Ваш будет первым!