Г1АЛГ1АЙ МЕХКА КЪАМАН ЮКЪАРА ГАЗЕТ

Къонача зиракий яхь

Укх бетта хьалхарча деношка Наьсарен районе хилар гIалгIай меттахи литературахи йола олимпиада. Массайолча юрташкара 7 – 11 класссашка дешаш бола кIаьнкаши йиIигаши къовсабелар наьна меттах говзагIвар гучаваккха а белгалваккха а дагахьа. Яхь дIаяхьа аьнна хержа моттиг яр ТIой-Юртара №1 йола юкъера школа. Итташ шераш да, комииссенна чувоагIаш, аз цунна юкъе дакъа лоаца. Шерагара шу мел доал дикагIа кийчбеле, ховш дола хIама кIоаргагIа, дукхагIа долаш хул юрташкара тIауха дешархой. Цу гIулакхо тешаву, гIалгIай мотт вай юрташка бахаш а дийнлуш а боагIаш хиларах. Укх наькъа къаьстта дика кийчденнад аьнна хийтар сона ТIой-Юртара, Эккажкъонгий-Юртара, Сурхо тIара, ГIайрбик-Юртара, Долакха-Юртара бераш. Цар хьагойтар меттаца а литератураца а шоай хьоашал хилар. Предложенешта а дешашта а массе тайпара тохкам бир, кицай маIанаш даьшхар, дешашта таржамаш дир, йоазонцара гIалаташ тоадир, стихотворенена бизза тохкам бир, дагахьа байташ йийшар дуккхачар. Къаьстта а дика толамаш даьхар наьна меттах, литературах ТIой-Юртарча №3 йолча юкъерча школан 9-ча класса дешархочо Яндиева Залинас, Сурхо тIарча ООШ дешархочо Измайлова Хьавас. Иштта хьалхара моттигаш яьхар 10 классан дешархоша Бекова Лейлас (ТIой-Юрт, СОШ №1), Нальгиев Азраила (Пхьилекъонгий-Юрт, СОШ №2); 11 классе багIача Евлоева Мадинас (Iаьлий-Юрт, гимнази), Толдиева Хьавас (Эккажкъонгий-Юрт, СОШ №2), Газикова Залинас (Долакха-Юрт, СОШ №1), кхычар.

ХIаьта а белгалдаккха деза ерригача школаша цига шоай дешархой бахкийта цахилар, цхьаболча дешархошта меттах, литературах ховр лохача боарам тIа хилар. Къаьстта а новкъа хилар сона цхьан дешархочо аьнна дешаш. Ше хIама ца а яздеш дIайодаш хилар зийча, цо аьлар: «Сай лоIамах-м енаяц со укхаза». Вешта аьлча, хьехархочо низагIа яйтай со, яха маIан дар цун дешашка. Бар цига иштта баьхкараш. Уж е хIама ца ховш дIаболхар, е книжка хьалдаьккхе, цу тIа хьежа болалора. ТIехьа тIайоагIача хана цу тайпара «хьаькъала дай» олимпиадашка ца ахийтача бакъахьа хетар сона.

Дешархой балхашка хьожаш, цар мах беш хилар дуккхача шерашка къахьегаш хьабоагIа хьехархой Шанхоева Макка (Наьсарен района методически совета кулгалхо), Джимиева Лейла, Зурабова Мадина, Хашагульгова Тайбат, кхыбараш. Дикка гIо дир из болх ханнахьа а боаггIача беса дика а чакхбаккха Наьсарен района дешара урхаллен болхлоша Евлоева Мадинас, Аушева Хадижата, ТIой-Юртарча №1 йолча школан кулгалхоша. Хаьшашта цар дIаеннаяр паргIата, сийрда, мел эша хьалаш чухьа дола классаш. ХIаране наIар тIа хьалтеха белгало яр, цу чу болх беш малагIча классан дешархой хургба хьахайташ. Ала деза, гIалгIай меттахи литературахи долча къовсамашка дакъа лоацаш хилац ворхIлагIча, дIахо дIайолхача классашка дешаш дола бераш мара. ХIаьта республикан олимпиаде 9 — 11-ча дагIараш мара долхац. Цудухьа цхьаболча дешархошта районе хиннача къовсамаш тIа чакхъяьлар из яхь. Царех бар 7 – 8-ча багIараш.

Цул совгIа, духхьал гIалгIай меттахи литературахи къовсабенна ца Iеш, района дешархой хьежар эрсий меттах, литературах, физиках, математиках, кхыдолча Iилмаех шоашта фу хов. Укхаза а гучабаьлар дика дешаш хьабоагIа, Iилмашца цIенхашттара уйла йола кхувшбоагIараш.

Бокъонца бола зиракаш (мудрецы) вайна гучабаргба районашка толаш хиннараш шоайла къовсабелча. Шолжа, ЖIайрахьа, МагIалбика, Наьсарен районашкара эггара хьаькъал дола бераш республикан яхьашка вIашагIкхетаргда. Из ди хьатIакхача а дукха ха яц.

С. Арчаков

Сурта тIа: олимпиада доакъашхой, из чакхъяьнначул тIехьагIа

07.12.2017 11:20
67

Комментарии

Нет комментариев. Ваш будет первым!
Загрузка...