Боккхача дезала даь бокъонаш меттаоттайир
02.05.2024 11:21
ДегӀа могашал эшаенна волча кхаь бера даьга, берашта хьахьожадаь ахча доагӀарех вац хьо, аьнна, хоадам баьбар Росси вахара ганзо. Наьха бокъонех йолча моттига болхлой оарцагӀбаьхар дог дехача къонахчо.
«БӀаьстан хьалхарча бетта чуденнадар аз каьхаташ, берашта хьадоагӀача ахчанна. Аз хьалха хьаийдаьдар из ахча, 100% кхоачаш; бакъда укх наькъа, из ахча дагӀац хьона, аьнна, каьхаташ юхадаьхкад са.
Цу харцахьарча хӀаман духьала сайна новкъостал дар дех аз шуга», - ишттача дехарца, УПЧ офисе ший бала кодабеш, хилар дезала да. Сиха оарцагӀбаьннача цигарча болхлоша хьатоадир гӀулакх, шедар техкачул тӀехьагӀа. ХӀара бера 14 294 сом ахча хьаухаргдолаш, соцам бир цига.
