«5-9-ча классашка дагӀача, ГӀалгӀайчен дукхача юрташкара даьхкача бераша яхьаш дӀайихьар «Робофутбол», «Кеер the lӀne» («Ер никъ лелабе») яхача даькъе. «Робофутбола» доакъашхой, дукхагӀа роботаш юкъейоахаш, бургац чуяккха езаш бар шоашта духьала ловзачар наӀарашка, хӀаьта «Keep the lӀne» даькъ тӀа, шоаш къаьстта а лелаш,  ма хулла кӀезигагӀа ха а йоаеш, хьалхашка нийслу доазув тӀехьадита дезаш бар, нийслуча халонех  лоархӀабеш», -аьлар тхоца къамаьл даьчо.

«Робофутболах» котбаьлар «Кванториума» викалаш Пхьиленаькъан Сулейман, Кхоартой СайфуллахӀ. Дото совгӀаташ даьхар Дарсиганаькъан Джафара, Заьзганаькъан Идриса, борза майдилг елар Йовлой Ахьмада, Билала.

«Keep the lӀne» даькъ тӀа дикагӀа толамаш даьхар Пхьиленаькъан Дауда («Кванториум»). ШоллагӀча моттиге хилар Жандаранаькъан Мухьмад-Басир, Оздой ИбрахӀим (Долакха-Юртара № 3 йола ишкол). КхоалагӀа моттиг яьккхар Тутайнаькъан Мухьмада («Кванториум»).

«Робоквант-2024» яхача республикан чемпионата доакъашхоша хьагойтар; робототехниках, искусственни интеллекта даькъ тӀа шоай говзал хилар.

Чемпионат дӀаяхьаро таро хулийт, шоайла ховш дар дӀа-юха дала, начӀал дола къонабараш дикагӀа дегӀабоалабе.