Хиво юрта зе дергдоацаш, сунт тохаш боахк болхлой
Юрта хий чудувргдоацаш, сунт тоха болабеннаб Йоккхача Ачалкхе. Дукха ха йоацаш, чухьийддача догӀан хиво дукха зе дир Ломоносова оалача урамерча бахархошта. Сунт хьалде эшаш дола ахча деннар ва Паччахьалкхен Думан депутат вола Татренаькъан Муслим. Цул хьалхагӀа лаьтта, хий юхасоцаде низ ца кхоачаш диса сунт хьалдеш, гӀо даьр а из вар.
«Хий чухьийдда, нах халча хьале этталга дӀаховшше, вай мехкадас Келаматанаькъан Махьмуд-Ӏаьлас тӀадилла декхар да из. Цу тайпара хӀама кхы хургдоацаш бола болх хьабе, аьнна, соцам бир республикан кулгалхочо. Татренаькъан Муслимаца из гӀулакх тохкаш баьхкача кхален кулгалхоша лаьрхӀар, хий юхасецадергдола цхьаькха духьале хьалъе, аьнна. Карарча хана сунт хьалдеш къахьегаш боахк болхлой цу юрта», - дийцар «Сердало» газетага кхален администраце зарбан болх лелабераша.
