«Сона хов бакъдар малагӀа да!» яха спектакль гойтаргья, Коталон цӀай дездеш
«Сона хов бакъдар малагӀа да!» яха, Донецкерча паччахьалкхен академически ашарий-драматически Бровуна М.М. цӀерагӀча театра спектакль го аьттув хургба вай республикерча бахархой, Коталон цӀай дездеча дийнахьа. Наьсарерча культуран цӀагӀа гойтаргйолча спектакле хьокхаргда, къамаш кхестадеш болча наха Ӏазапе лоаттабаьча Донбассерча наьха вахар, дуккхача шерашка цар токхаш лаьттар.
«2017-ча шера арадаьннача «Донбассера тӀом: къаман дӀаяздаьраш» яхача книжках пайда эцаш, вӀашагӀъеллай спектакль. 2014-2017-ча шерашка Киеве леладаь бокъо йоацараш текхача наха дийцараш юкъедихьад книжканна. Иштта спектакло чулаьцад, мукъаяьхача моттигашкарча наха дийцараш а. Из деррига гулдеш лийннар я, режиссёр Ульянова Алла.
Спектакла керттера турпалаш – Донецке бахаш бола, тайп-тайпара балхаш леладу нах: лораш, таксисташ, журналисташ, хьехархой, берий бешамашкара болхлой. Шоай вахаре нийсденна бокъонца дола хӀамаш да цар дувцараш, цхьаккха хӀама тӀатеха доацаш», - дийцар «Сердало» газетага Базорканаькъан Идриса цӀерах долча драматически театре.
«Сона хов бакъдар малагӀа да!» яха спектакль йолалургья укх бетта 9-ча дийнахьа нийсса пхи сахьат даьлча. Цунга хьажа безам мел барашта йийлла латтаргья театра наӀараш.
